Denmark: Cisaam ayaa raba, inuu daaradda dugsiga ku salaamo Siciid. Waa in aanu ku hadlin carabi, urduu, turki ama luqad kale ee ajinebiga, hadday noqoto talada xisbiga dadwaynaha deenishka.
 
Xisbiga ayaa soo jeedinaya xeer, gebi ahaan mamnuucaya in lagu hadlo luqad aan deenish ahayn, marka xisadaha lagu jiro iyo nusasaacaha. Sidaas waxa qoray wargayska Politiken.
 
- Waa muhiim in laga hortago xasaradda. Waxa aynnu dugiyada ku aragnay tusaalayaal, ardayda la xasaradaynayo oo lagu xamanayo luqado ajinebi ah. Waxa aannu rabnaa, in aannu hirgelinno, in aan ardaygu ku hadlin luqad kale oo aan deenish ahayn. Dugsiyada hoose/dhexe ee deenishka waxa lagaga hadlayaa deenish, ayay tidhi afhayeenka waxbarashada ee xisbiga dadwaynaha deenishka, Marlene Harpsøe.

Xadgudubka waa la isku ciqaabi karaa
Macallimiinta ayay saaran tahay, inay dugsi walba ka fuliyaan mamnuucista luqadaha ajinebiga.
Ciqaabta la marinayo ardayda ku xadgudubta mamnuucista, waxay noqon kartaa dugsiga oo muddo lagu xidho ama wadahadal loogu yeedho waalidkood, ayuu soo jeediyay xisbiga dadwaynaha deenishku.

Tu kale oo ka baxsan mamnuucista luqadaha ajinebiga ah, qiyamka siyaasadeed ee la xidhiidha dugsiga hoose/dhexe, xisbiga DF-gu wuxu qabaa in la mamnuuco kala soocista wiilasha iyo hablaha xilliga waxbarashada, waxana uu rabaa in ardayda asalkoodu ajinebiga tahay lagu kala firdhiyo dugsiyada hoose/dhexe.

Haarder wuu ka soo horjeedaa
Wasiirka waxbarashada Bertel Haarder wuxu ku adkaystay, in dawladaha hoose iyo dugsiyadu arrimahaas u madax bannaanaadaan.

- Dhab ahaan kuwani maaha arrimo, aynnu u goaamin karno Danmark oo dhan. Waa in aynnu xoojinno masuuliyadda hoggaanka oo qaddarkooda aynaan hoos u dhigin. Wasiir u ma ihi xijaabka, daahyada xamaamada, cuntooyinka nusasaacaha, kulammada waalidka loogu yeedhayo iyo suaalaha la xidhiidha waxa lagaga hadlayo daaradda dugsiga. Arrintaasna waan ku adkaysanayaa, ayuu yidhi Bertel Haarder.

Waxaa diyaarisay: Karen Nielsen
Waxa tarjumay: Ahmed Diria Liban