Hargeysa(RH):- Magaalooyinka waaweyn ee dalka Somaliland ayaa maanta si weyn looga xusay maalintii la dheelmiyey Nebigeenna Suubban ee Muxamed nebad-gelyo iyo Naxariisi korkiisa ha ahaatee.

Xuska maalintii la dheelmiyey ayaa maanta si weyn loogaga dabbaal-degay gobollada iyo degmooyinka kala duwan ee dalka Jamhuuriyadda Somaliland, iyada oo Culimada iyo qaybaha Bulshadu Xaflado kala duwan oo Qasiidooyin Nebi ammaan ah iyo Axaadiis Dheelminta Nebi Muxamed (S.C.W) ku saabsan laga jeediyey ay ku qaabbileen xuska maalintan.

Magaalooyinka waaweyn ee Somaliland sida Boorama, Hargeysa, Berbera, Burco, Ceerigaabo, goobaha Xeryaha Culimada ee degmooyin kale oo Somaliland ka mid ah, ayaa dhammaantood laga xusay maalintii la dheelmiyey Nebi Muxamed Nabadgelyo iyo Naxariisi korkiisa ha ahaatee.

Xafladaha loogu dabbaal-degayey dheelmintii Nebi Muxamed (S.C,W) oo maanta ku beegnayd waxa ka mid ahayd Xaflad lagu qabtay Huteelka Maansoor ee magaalada Hargeysa, taasoo ay ka qaybgaleen Culimada Waaweyn ee Somaliland oo uu horkacayo Wasiirka Diinta iyo Aw-qaafta Somaliland, Madax-dhaqmeed, Siyaasiyiin ka kala socday Xisbiyada iyo Ururrada Siyaasadda, Dhalinyaro, Waayeel iyo dadweyne kale oo badan.

Waxay Xafladdaa Culimadu ka jeediyeen Axaadiis ka sheekaynaya Dheelmintii Nebi Muxamed (S.C.W), Aayado Quraanka Kariimka ah ku jira oo maalintaa ka hadlaya iyo Qasiidooyin tiro badan oo Nebi-ammaan ah.

Sheekh Yuusuf Cabdi Xoore oo ka tirsan Saraakiisha Culimada ah ee Wasaarada Diinta iyo Awqaafta Somaliland oo isagu ka hadlay munaasibaddaa lagu xusayey dheelmintii Nebi Muxamed nabadgelyo iyo naxariisi korkiisa ha ahaatee, ayaa ka sheekeeyey muhiimadda maalintan, waxaanu sheegay inay muhiin tahay in la xuso maalintan, isla markaana ay Culimada iyo Masuuliyiinta Maamulka Somaliland-ba ka wada qayb-qaataan xuska iyo weynaynta maalintan.

Sidoo kale, Sheekh Axmed Dhinbiil Guuleed oo Isaguna Wasaaradda Diinta iyo Aw-qaafta Somaliland ka tirsan, ayaa sheegay inay maalintani tahay mid muhiimad gaara u leh Shucuubta Islaamka, sidaa daraaddeedna waxa uu sheegay inay Wasaarad ahaan qayb weyn ka qaadanayaan Xuska maalinta dheelmintii Nebigeenna Suubban ee Muxamed (S.C.W).

Waxa iyaguna Munaasibaddaa ka hadlay Masuuliyiin Xukuumadda Siilaanyo ka tirsan, Siyaasiyiin ka kala socday Xisbiyada UDUB, UCID, KULMIYE, Urur-siyaasadeedka DALSAN, Culimo, Madax-dhaqmeed iyo Aqoonyahaniin kala duwan, kuwaas oo dhammaantood ku dheeraaday muhiimadda ay maalintani u leedahay Muslimiinta iyo sida ay u habboon tahay in la wayneeyo xuska maalinta dheelmintii Nebi Muxamed nabadgelyo iyo naxariisi korkiisa ha ahaatee (S.C.W) oo sannad kasta maanta oo kale la xuso.

Maalintan ayaa sannad kasta maanta oo kale laga xusaa guud ahaanba Somaliland iyo meelo badan oo dhulka Soomaalidu degto iyo dunida Muslimka ah, iyada oo Qasiidooyin Nebi-ammaan ah lagu qaabbilo maalintan sannad kasta Somaliland.

Radio Hormuud.dk
Studio2
Hargeysa/Somaliland.