Buulo Mareer (RH) Warar kala duwan ayaa ka soo baxaya weerrar xaley saqdii dhexe ka dhacay deeganka Buulo-mareer ee gobalka Shabeellaha Hoose.

Weerrarkaas ayaa la sheegay in lagu dilay Askari ka mid ah ciidanka qaaska ah ee Faraniiska iyo qofkii ay badbaadinayeen oo ahaa Denis allex oo seddax sano lagu heestay koonfurta Soomaaliya.

War ka soo baxay wasaarada gaashandhigga dalka Faransiiska ayaa lagu sheegay in labada qof ay ku dhinteen intii uu socday weerar gaar ah oo lagu soo badbaadinaayay qof Faransiiska u dhashay oo lagu afduubay Soomaaliya 2009-kii.

Mr. Alex ayaa ka tirsanaa sirdoonka Faransiiska, kaasoo la sheegay in lagu dilay intii uu socday howgalka, waxa kaloo dowladda Faransiiska ay sheegtay in la dilay illaa 17-Al-Shabaab ah.

Dad ku sugan Buulo Mareer ayaa Radio Hormuud u sheegay in ay maqleen madaafiic iyo dagaal dhowr daqiiqo socday oo ka dhacay saldhig ku yaalla deegganka, oo ay ku sugnaayeen Al-Shabaab.

Waxa kaloo la sheegayaa in weerrarkaas ay ku dhinteen afar qof oo ay ku jito haweeney uur leh, qaar kalena ay  ku dhaawacmeen xabadaha la is-weedaarsanaayay intii uu socday howgalka.

Ciidamada qaaska ah ee Faransiiska ee weerarkaas qaaday ayaa la sheegay in deegganka  lagu keenay helikontar  kaddib markii laga werhalay halka lagu hayo Mr. Alex

Dhinaca kale, Ururka Alshabaab ayaa iyana sheegay in Denis Allex uu weli nool yahay, uuna ka fogaa goobta lagu dagaalamay, waxayna Al-Shabaab ku tilmaantay qorshii lagu soo badbaadin lagaa Mr Alex Denis in uu guul dareystay.

Wasiirka gaashandhigga Faransiiska Jean-Yves Le Drian ayaa sidoo kale saxaafadda ugu sheegay sabtida maanta ah magaalada Paris in ay aaminsan yihiin Denis Allex in uu ku dhintay gacanta kooxaha heestay."

Ninkan ayaa bishii July sannadkii 2009-kii isaga iyo sarkaal kale waxa laga afduubtay hotel Saxafi ee magaalada Muqdisho dhowr bil kaddib ayaa sarkaalkii hore uu ka soo badbaday kooxdii heestay, waxana dib loogu celiyay waddankiisa.

Labadan sarkaal ayaa magaalada Muqdisho xilligaas u yimid siddii ay gacan u siin lahaayeen dowladii ku-meel-gaarka ahayd ee madaxweyne Shariif Sheekh Axmed.

Dhowr jeer ayuu Mr. Allex uu soo duubay cajalad muuqaal ah oo uu uga codsanaayo dowladda Faransiiska siddii lagu soo badbaadin lahaa.

Radio Hormuud

Studio 3

Mogadishu Somalia